Gisang-at na sa Office of the Ombudsman ang pormal nga reklamo sa nagkalain-laing sectoral groups batok sa duha ka kanhi opisyal sa gobyerno nga si kanhi Undersecretary Abeian Bersamin ug kanhi DepEd Undersecretary Triger Olaivar.
Gipangulohan kini sa mga grupong Kilusang Bayan Kontra Kurakot ug Bagong Alyansang Makabayan (BAYAN), gumikan sa giingong mga anomaliya sa flood control projects nga dugay nang gikuwestiyon sa publiko.
Sumala pa ni David San Juan sa Kilusang Bayan Kontra Kurakot, tumong sa maong lakang nga Cmapanubag ang mga opisyal sa posibleng paglapas sa Code of Ethics of Public Officials, Anti-Graft and Corrupt Practices Act (RA 3019), ug kasong Grave Misconduct aron mahatagan og hustisya ang pundo sa katawhan.
Dugang pa niini, gipasiugdahan ni Teddy Casiño, ang Chairperson sa Bagong Alyansang Makabayan, nga kining reklamo nagsilbing pahinumdom nga wala malimot ang katawhan sa mga isyu sa korapsyon sa flood control bisan pa man sa giingong koneksyon sa mga reklamado ngadto sa Malacañang ubos sa administrasyon ni Presidente Ferdinand “Bongbong” Marcos Jr.
Gihangyo sa mga grupo ang Ombudsman nga seryosong susihon ang maong mga pasangil aron sa katapusan makab-ot ang katin-awan sa mga proyekto nga naggamit og dako nga kantidad apan wala gihapon makasulbad sa problema sa baha sa nasud.