Landing sa balay-tambalanan ang usa ka traynta i-says anyos nga lalaki, samtang balhog na sa prisohan ang iyang kauban sa inom human kini mangdunggab tungod lang sa wala masabtan nga lalis sa Barangay Malinao, lungsod sa Kalilangan, Bukidnon.
Base sa imbestigasyon sa Kalilangan Municipal Police Station, nag-inom ang biktima ug ang traynta i-nueve anyos nga suspek sa dihang kalit nga misilaob ang mainit nga panaglalis sa duha. Tungod niini, gidunggab sa suspek ang biktima diin nakaangkon kini og samad sa ubos nga bahin sa iyang likod nga daling gidala sa ospital.
Human sa maong krimen, daling mitahan ang suspek ngadto sa mga otoridad pinaagi sa tabang sa Barangay Captain ug mga sakop sa Civilian Volunteer Organization kun CVO.Sa karon, tanggong na sa kustodiya sa Kalilangan MPS ang suspek samtang giandam na ang tukmang kaso batok kaniya, ug personal nga bikil kun misunderstanding gihapon ang gitan-aw sa kapolisan nga motibo sa maong insidente.