Usa ka dakong oportunidad ang naghulat karon alang sa kabatan-onan nga anaa sa sektor sa agrikultura human gipakita ni Jieselle Bheb Vicariato, usa ka awardee sa Department of Agriculture (DA) Young Farmers Challenge, ang dakong suporta nga gitanyag sa kagamhanan alang sa mga batan-ong negosyante.
Gipasabot ni Vicariato nga ang maong programa bukas alang sa mga nag-edad 18 hangtod 30 anyos. Ang mga partisipante mopaubos sa business pitching ug interview aron mapili, diin adunay naghulat nga grant nga ₱80,000 sa provincial level, ₱150,000 sa regional, ug ₱300,000 sa national level—nga moabot sa kinatibuk-ang kantidad nga ₱530,000.
Sa iyang personal nga kasinatian, gibutyag ni Vicariato nga nagsugod siya sa ginagmay nga puhunan gikan sa iyang kita sa dance bookings aron makatukod og tangkal sa kanding uban sa tabang sa iyang pamilya dinhi sa Bukidnon. Tungod sa iyang paningkamot, nahimo siyang usa sa duha ka representante sa Region 10 ngadto sa national level, gikan sa 35 ka mga partisipante sa tibuok nasod.
Bisan pa man sa hagit sa kompetisyon, sama sa taas nga expectations ug language barrier, gipasiugda ni Vicariato nga padayon ang iyang pagpangandam aron mapalambo pa ang iyang agribusiness. Ang maong programa nagpamatuod nga dako ang suporta sa gobyerno alang sa mga batan-on nga tinguha nga mosulod ug molampus sa natad sa modernong pagpanguma.