Nabalda ang operasyon sa mga tugpahanan sa Europe human mokabat sa 10 ka flights ang gitarget sa bomb threats niadtong Nobyembre 3, hinungdan nga temporaryong gisirad-an ang usa ka tugpahanan sa Warsaw, Poland.
Labing naapektuhan sa maong mga hulga ang Ryanair, diin upat sa mga flights niini padulong sa nagkadaiyang destinasyon ang gitarget.
Narekord usab ang mga hulga sa mga flights nga molupad ug motugpa sa Heathrow Airport sa London, United Kingdom, sumala sa Metropolitan Police.
Gipakilos usab ang air force sa Italy aron i-escort ang usa ka Ryanair flight gikan sa Dublin padulong sa Rome-Fiumicino Airport.
Lakip usab sa gitaho ang flights sa Scandinavian Airlines gikan Copenhagen ug LOT gikan Heathrow nga padulong sa Warsaw.
Apan wala mahikaplagang mga eksplosibo sa mga eroplano ug tugpahanan human sa halapad nga pagpangusisa sa mga otoridad.