Nagpaandam ang PAGASA sa mga lokal nga panggamhanan ug komunidad sa posibleng kakulang sa suplay sa tubig tungod sa gipaabot nga pagkunhod sa ulan sa Mindanao sa mosunod nga mga bulan gumikan sa El Niño phenomenon.
Sumala kang Kevin Cadiz, Weather Specialist sa Mindanao Forecasting Section sa PAGASA-Northern Mindanao, ubos sa normal ang gipaabot nga pag-ulan sa Bukidnon ug Misamis Oriental sugod Nobyembre, nga mas mokunhod pa sa Disyembre hangtod sa unang mga bulan sa sunod tuig.
Gipasabot ni Cadiz nga posibleng makasinati og dry spell ang Bukidnon ug drought condition ang Misamis Oriental sa Enero, samtang gipaabot nga mokaylap ang hulaw sa tibuok Mindanao sa Pebrero hangtod Abril.
Matud niya, bisan adunay El Niño, posible gihapon ang pag-ulan sa Bukidnon tungod sa kabukiran nga makaapekto sa direksiyon sa hangin ug makapataas sa posibilidad sa pag-ulan. Apan, dili kini magpasabot nga dili na maapektuhan sa pagkunhod sa kinatibuk-ang ulan ang maong probinsya.
Sa laing bahin, gipaabot usab sa PAGASA ang usa hangtod duha ka bagyo sa Nobyembre ug susamang gidaghanon sa Disyembre. Apan, mas dako ang posibilidad nga moagi kini sa amihanang bahin sa nasud kaysa Mindanao.
Nanawagan si Cadiz sa mga LGU nga mangandam sa posibleng pagkunhod sa suplay sa tubig, samtang gitambagan ang publiko nga mag-andam sa mga epekto sa El Niño.