Gipaningkamotan sa pamunuan sa Bukidnon Provincial Medical Center (BPMC) nga ma-hatag ang delayed nga sweldo sa usa ka grupo sa mga empleyado human masangit ang ilang payroll tungod sa kulang nga dokumento. Sa pakighinabi sa Bombo Radyo kang BPMC Chief Dr. Miguel Antonio C. Prantilla, kapin 600 ang ilang mga empleyado, lakip ang regular, casual ug job order workers. Matud niya, ang payroll sa ospital giproceso pinaagi sa mga dokumento, busa kung adunay empleyado nga maulahi sa pagsumite sa leave forms o uban pang requirements, madamay usab ang ubang kauban nga sakop sa samang payroll.
Gipasabot ni Prantilla nga dugay na kining problemaha ug nagpadayon usab ang ilang pagpahimangno ug pagdisiplina sa mga empleyadong dili makakompleto sa ilang mga obligasyon. Nangita usab sila og mekanismo uban sa HR, accounting ug budget office aron ang sweldo lamang sa empleyadong kulang og dokumento ang malangan, imbes nga madamay ang tibuok payroll.
Gilauman sa pamunuan nga maisulod ang sweldo sa apektadong mga empleyado sa hapon ug madawat kini pagkaugma. Apan wala mopasalig si Prantilla nga dili na kini mausab, imbes nagpadayon sila sa pagpangita og mas maayong sistema lakip na ang full digitalization sa pagproseso sa payroll.
Sa laing bahin, gipadayag usab ni Prantilla nga misaka ang gidaghanon sa mga pasyente sa BPMC, diin dili moubos sa 220 ang ilang average nga mga admitted patients kada adlaw, bisan og 150 lamang ang bed capacity. Miabot pa gani sa 285 ang pinakataas nga natala, hinungdan nga nag-atubang usab ang ospital og hagit sa kapasidad sa pasilidad, kagamitan ug suplay sa tambal.