Gipanghimakak sa buhatan ni Cagayan de Oro City 1st District Representative Lordan Suan ang nagpakalat nga pahayag sa social media nga naglambigit kaniya sa panawagan alang sa shoot-to-kill order batok kay Senador Ronald “Bato” Dela Rosa. Sa pakighinabi sa Bombo Radyo Malaybalay gipadayag ni Bert Amplayo Jr., Assistant District Director sa buhatan ni Suan, nga usa ka peke ug walay kamatuorang balita ang maong pahayag nga naggikan lamang sa mga kuwestiyonableng Facebook page nga adunay politikanhong katuyoan.
Gipatin-aw usab ni Amplayo nga gigamit lamang ang litrato sa kongresista aron madaot ang iyang reputasyon, samtang gipasabot niini nga walay bisan unsang lig-ong konstitusyonal o legal nga basihan ang maong panawagan alang sa shoot-to-kill order batok sa usa ka naglingkod nga senador.
Hinuon, gipili sa ilang buhatan nga padayong i-report sa Meta ang maong mga panid imbes nga patolan, aron mas mapukos sa gobyerno ang panahon sa mas importanteng mga isyu sa seguridad.