Usa ka talagsaong kondisyon ang nasinati sa usa ka 42-anyos nga lalaki sa Siberia, sa Russia, human nadiskobrehan sa mga doktor nga adunay nitubong tanom sulod mismo sa iyang mata.
Giila ang lalaki nga si Maxim Sleptsov nga sulod sa upat ka bulan nag-antos sa grabeng sakit sa ulo, pagdoble sa panan-aw, pagpamula ug paghubag sa mata.
Matud kang Sleptsov, nagsugod ang iyang kondisyon human siya maigo sa usa ka sanga sa nawong atol sa iyang pagbakasyon sa Abyysky District sa amihanang bahin sa Russia.
Human sa insidente, nakakuha siya og gamayng piraso sa kahoy pinaagi sa paghugas sa mata, apan wala niini mamatikdi nga adunay binhing nahibilin niini.
Sa ulahi, miturok ang maong binhi ug mituhop ang gamot niini sa conjunctival tissue o nipis nga lamad nga nagtabon sa puti nga bahin sa mata.
Matud ni Chief Physician Ivan Lutskan, nakapakurat kanila ang maong kaso tungod sa pagtubo sa binhi sulod sa mata ug sa paglusot sa gamot niini sa tissue.
Gikuha sa ophthalmologist nga si Elizaveta Karpova ang mitubong binhi gamit ang injection needle, diin mikabat sa tulo ka milimetro ang gitas-on sa gamot niini.
Sa pagkakaron, naayo na ang kahimtang ni Sleptsov, nawala na ang iyang sakit sa ulo ug mibalik na usab sa normal ang iyang panan-aw.