Gipaniguro sa Department of Agriculture (DA) nga adunay igong pondo sa 2026 national budget alang sa mga lakang batok sa El Niño, lakip ang P61.99-billion nga plano aron mapanalipdan ang produksyon sa pagkaon ug panginabuhian sa mga mag-uuma ug mangingisda.
Gikumpirma ni DA Assistant Secretary U-Nichols Manalo atol sa hearing sa House Committee on Agriculture and Food nga mahimong gamiton ang pondo gikan sa 2026 General Appropriations Act alang sa maong mga programa, lakip ang P6.2 billion nga unang gipagawas ubos sa UPLIFT program.
Kinadak-ang bahin sa plano ang P35 billion alang sa mga binhi, abono ug uban pang panginahanglan sa pagpananom.
Lakip usab sa mga lakang ang rehabilitasyon sa irigasyon, solar-powered irrigation, gagmayng water impounding facilities ug cloud seeding, ingon man ang tabang alang sa kahayopan, manok, palaisdaan, crop insurance ug pautang.
Naglakip usab ang UPLIFT sa mokabat sa P3 billion nga fuel assistance alang sa mga mag-uuma, mangingisda ug truckers.
Samtang, nangayo pa ang DA og dugang P371 million alang sa cloud seeding ug pagkontrol sa mga peste sa tubo. Gisugyot usab ang P10-billion nga pondo alang sa tabang sa mga mag-uuma ug mangingisda sa 2027, lakip ang pagpalig-on sa pagbantay sa presyo, transportasyon ug Kadiwa program aron mapabiling barato ang mga pagkaon.