Indian nga turista, patay sa panagbangga sa duha ka helicopter sa Nepal

Patay ang usa ka Indian nga turista samtang tulo pa ang naangol human nagbangga ang duha ka helicopter sa Pheriche, Solukhumbu District sa Nepal.

Giila ang namatay nga si Vasanth Kumar Balaramudu nga sakay sa helicopter sa Fishtail Air.

Nahitabo ang aksidente pasado alas-otso sa buntag samtang misulay og landing ang duha ka helicopter ug nagbangga ang ilang rotor blades.

Lakip sa mga naangol ang usa ka turista gikan sa New Zealand ug ang duha ka piloto sa mga helicopter.

Gidala dayon ang mga naangol sa Kathmandu alang sa tukmang pagpanambal. Samtang, nagpadayon ang imbestigasyon sa mga otoridad aron matino ang hinungdan sa maong aksidente.