MALAYBALAY CITY, BUKIDNON — Gipahayag sa legal expert ug law professor nga si Atty. Oscar S. Moreno nga usa ka klarong paglapas sa mga regulasyon sa panggamhanan ang paghatag sa confidential funds ngadto sa usa ka indibidwal nga dili designated accountable officer.
Sa pakighinabi sa Bombo Radyo Malaybalay, gipatin-aw ni Moreno nga bisan pa man kon confidential ang pondo, nagpabili kini nga kwarta sa publiko nga kinahanglang mosubay sa mga sumbanan sa accountability. Sumala kaniya, ang Special Disbursing Officer nga si Gina Acosta ang gitugyanan sa pondo, apan iyang gitugyan ang kwarta ngadto kang Col. Latchica—usa ka opisyal nga walay legal nga awtoridad ug nakalapas sa mga patakaran sa paggasto sa pondo sa gobyerno.
Dugang ni Moreno, kini ang pangunang hinungdan nga direktang nagpagawas ang Commission on Audit (COA) og Notice of Disallowance human mapamatud-an ang pahayag ni Acosta ubos sa panumpa atol sa hearing. Mas nagkabug-at ang maong isyu tungod kay mokabat sa ₱500 milyon hangtod ₱600 milyon ang nalambigit nga pondo, diin giangkon ni Acosta nga iyang gitugyan ang kwarta human sa direktiba gikan sa Bise Presidente.