Duha ka batan-ong babaye ang nadakpan sa buy-bust operation batok sa ilegal nga droga sa Barangay 9 niadtong milabay’ng adlaw. Sumala sa pamahayag sa usa ka opisyal sa dakbayan.
Matud pa ni PLtCol. Ariel Philip Pontillas, Officer-In-Charge sa Malaybalay City Police Station, padayon nga prayoridad sa kapulisan ug sa pangagamhanan sa dakbayan ang pakigbatok sa ilegal nga droga pinaagi sa mga operasyon aron mapugngan ang pagbaligya ug paggamit niini.
Gipasalig usab sa opisyal nga magpadayon ang kampanya aron mahimong malinawon ug limpyo sa ilegal nga droga ang dakbayan.
Sa pikas bahin, gipasakaan na og kaso ang suspek sa pagpamusil sa Upper Pulangi, Malaybalay City, human kini makaikyas sa dihang miresponde ang kapulisan kauban ang kasundalohan ug mga opisyal sa barangay.
Gibutyag ni PLtCol. Pontillas, nahitabo ang insidente niadtong miaging semana, diin narekober sa mga otoridad ang armas nga gigamit sa suspek, apan wala kini madakpi.
Gipasabot usab sa opisyal nga dili kaayo apektado sa mga pagpamusil ang Malaybalay City ug ang kasikbit nga mga lungsod ug dakbayan, apan padayon gihapon ang pagpalig-on sa presensya sa kapulisan aron malikayan ang susamang insidente.
Lakip sa mga lakang ang pagpahigayon og panagsang inspeksiyon ug Oplan Bakal Sita aron masiguro ang kalinaw ug kahapsay sa komunidad.
Kabahin niini, gipadayon sa kapulisan ang kampanya batok sa pagsulod ug pagbaligya sa mga smuggled nga sigarilyo human nakumpiska ang mga kontrabando niadtong miaging Sabado, samtang gibantayan usab ang dagkong kargamento nga posibleng nalambigit sa maong ilegal nga kalihokan.
Gipunting sa opisyal og epekto sa kita sa gobyerno ang pagpangilad sa buhis pinaagi sa smuggling, busa padayon ang ilang paningkamot nga mapugngan kini nga kalihokan nga giisip nga usa ka porma sa pagsabotahe sa ekonomiya.