Gikuwestiyon sa usa ka ekonomista ug kanhi opisyal sa Oro Chamber ang kanunay nga pag-adjust paubos sa economic growth targets sa panggamhanan taliwala sa nagpabilin nga hinay nga pagtubo sa ekonomiya sa nasod.
Sa pakighinabi sa Bombo Radyo Malaybalay, gipahayag ni Ray Talimio Jr., kanhi miyembro sa Oro Chamber Economic Development Committee sa RDC-10, nga kinahanglang magtakda ang gobyerno og realistiko ug makab-ot nga projections imbes nga kanunay kining ipaubsan matag higayon nga mapyasco o dili maabot ang target.
Gipatin-aw ni Talimio nga samtang gipaabot nga motubo og 5 hangtod 6 porsyento ang ekonomiya sa tuig 2026, mikunhod kini ngadto sa 2.8 porsyento sa unang quarter ug 2.4 porsyento sa ikaduhang quarter. Tungod niini, gi-adjust paubos ang target ngadto sa 3.5 hangtod 4.5 porsyento—usa ka lihok nga sumala kaniya makapakubos sa kredibilidad sa economic projections sa panggamhanan ug sa Bangko Sentral ng Pilipinas (BSP).