IMPASUG-ONG, BUKIDNON — Luwas nga gitabang ug gipahiluna sa kapolisan ang usa ka 50-anyos nga lalaki human napalgan sa Atugan Bridge sa Sitio Kiasin, Barangay Capitan Bayong, Impasug-ong, Bukidnon niadtong Hulyo 17 sa udto.
Subay sa report ni Bukidnon Police Provincial Office (Buk PPO) Provincial Director PCOL Oliver Sotto Navales ngadto kang PBGEN Christopher Nortez Abrahano, usa ka concerned citizen ang nagpahibalo sa mga sakop sa Revitalized Police sa Barangay (RPSB) bahin sa maong lalaki nga namatikdan nga dugay nang nag-inusara sa tulay. Dihang girespondehan sa 1st Bukidnon PMFC ug Impasug-ong Municipal Police Station, giangkon sa lalaki nga nag-agi ra kini, apan tungod sa iyang gipakitang linihokan ug kahimtang, gitabang gilayon kini sa mga awtoridad aron malikayan ang bisan unsang disgrasya.
Gitugyan na ang maong indibidwal ngadto sa Impasug-ong Rescue Team ug Impasug-ong MPS aron mahatagan og saktong medical assessment, pag-atiman, ug kinahanglang suporta alang sa iyang kaayohan.