Giklaro karon sa usa ka labor group nga dili “anti-business” kundi usa lamang ka “recovery wage” ang gipangayong P200 hangtod P250 nga umento sa suholan sa nasud.
Sa pakighinabi sa Bombo Radyo Malaybalay, gibutyag ni Atty. Sonny Matula, presidente sa Federation of Free Workers, nga base sa mga pagtuon sa Senado ug Kamara, kaya sa mga negosyo ang maong usbaw. Gipasalig usab ni Matula nga exempted sa maong umento ang mga gagmay’ng negosyo o kadtong rehistrado isip Barangay Micro Business Enterprise (BMBE). Dugang pa niya, duna’y opsyon ang mga distressed companies nga mofayl og petition for exemption aron malikayan ang pagpanira o pagtangtang sa mga trabahante.
Gisaway usab ni Matula ang kasamtangang Regional Wage System tungod sa diskriminasyon sa suholan tali sa mga probinsya ug dagkung syudad, bisan og parehas lang ang kamahal sa presyo sa palaliton. Tungod niini, hugot nga giduso sa grupo ang pagpabalik sa National Minimum Wage aron mahatagan og patas nga dungog ug makiangayong suholan ang tanang mga mamumuo sa tibuok Pilipinas.