Gibutyag karon sa City Environment and Natural Resources Office (City ENRO) nga dakong gasto ang nakalas gikan sa pundo sa kagamhanan tungod sa padayong pagdumala sa nagpundok nga basura sa dakbayan sa Malaybalay.
Sa pakighinabi sa Bombo Radyo Malaybalay, gipasabot ni Dr. Jessie Suson, ang City ENRO Officer, nga dako ang gasto sa gobyerno alang sa operasyon sa landfill lakip na ang gasolina sa mga garbage trucks, suholan sa mga trabahante, ug maintenance sa pasilidad. Bisan pa man og miubos ang produksyon sa basura sa matag panimalay ngadto sa 0.25 kilograms matag adlaw, nagpabiling hagit ang napulo ka tonelada nga makolektang basura kada adlaw tungod sa nagkadaghang populasyon sa siyudad.
Tungod niini, hugot nga nanawagan si Suson sa publiko nga seryosohon ang waste segregation ug zero waste campaign. Matud sa opisyal, kon maminusan ang basura nga ilabay sa landfill, mas gamay usab ang magasto sa gobyerno—kwarta nga imbes sa basura lang padulong, mahimo untang magamit sa uban pang mapuslanong proyekto alang sa katawhan.