Gibutyag sa alkalde sa dakbayan sa Malayabalay ang mga plano sa pagpalambo sa ekonomiya ug imprastraktura sa Malaybalay City pinaagi sa pagpalapad sa commercial zone ug modernisasyon sa mga pasilidad sa syudad.
Sa pakighinabi sa Bombo Radyo Malaybalay kang Mayor Pabillaran nga nalakip sa plano ang pag-develop sa 10-hectare nga business center sa Casisang ug ibabaaw sa Rehab, nga gituyo aron mahimong bag-ong sentro sa negosyo ug kalihokan sa siyudad.
Ang proyekto gisuportahan sa P119 million nga savings sa 2025, diin P71 million ang igahin alang sa imprastraktura.
Gisugyot usab ang pagtukod og convention center nga magdani og mga seminar ug kumperensya, nga makatabang sa lokal nga ekonomiya pinaagi sa catering, transportasyon, ug accommodation.
Sa transportasyon, tumong sa proyekto nga mapagaan ang traffic gikan Sumpong hangtod Casisang.
Sa bahin sa equipment ug resources, gipasiugda sa alkalde ang transparent ug konserbatibong paggasto sa pondo, diin nakatipid ang syudad pinaagi sa maayong procurement system.
Nagpalit usab sila og lain-laing gamit sama sa emergency vans, motorsiklo, backhoe, dump trucks, ug uban pang heavy equipment para sa serbisyo sa mga barangay ug agrikultura.
Gisiguro usab sa administrasyon nga walay pabor-pabor sa suppliers ug gimonitor ang mga empleyado aron malikayan ang korapsyon ug internal interference.
Tibuok tumong sa mga inisyatibo mao ang pagpalig-on sa ekonomiya sa syudad ug paghatag og dugang trabaho sa mga residente pinaagi sa “economic ignition” sa lokal nga kalamboan.