Gipasalig sa Office of the Ombudsman nga padayon ang ilang pag-atiman sa pagkuha sa mga ebidensiya ug pagpadayon sa imbestigasyon sa kaso sa anomalya sa mga flood control projects.
Sumala kang Ombudsman Jesus Crispin ‘Boying’ Remulla, ang labing importante mao ang makuha nila ang mga ebidensiyang magamit sa imbestigasyon.
Giingon niya nga dili maapektuhan ang trabaho sa opisina bisan pa man og adunay kausaban sa liderato sa Senado, nga bag-ohay lang nahisgutan tungod kay kung mag-usab ang liderato, posible usab nga mapulihan ang mga pangulo o chairmanship sa matag komite, lakip na ang Senate Blue Ribbon Committee nga gipangulohan ni Senador Panfilo ‘Ping’ Lacson ug nagdumala sa imbestigasyon ug pagpangayo og accountability sa mga nalambigit sa flood control anomaly.
Dugang pa ni Remulla, nga nakigtimbayayong ang Office of the Ombudsman sa Senate Blue Ribbon Committee, apan dili siya mismo ang miapil sa miting, kundi si Assistant Ombudsman Mico Clavano ang nakig-istorya sa komite.
Matud niya nga importante ang maong relasyon gumikan pinaagi niini, makakuha og impormasyon ug makapatawag og mga testigo sa mga pagdungog sa Senado.
Sa pagkakaron, padayon gihapon ang imbestigasyon sa Office of the Ombudsman sa kaso sa maanomalyang flood control, lakip ang pagkolekta sa mga ebidensya aron maporma ang mga kaso batok sa mga indibidwal nga nalambigit sa korapsyon.