Gipasabot sa kanhi presidente sa Integrated Bar of the Philippines (IBP) nga kritikal ug sensitibo ang nagkaduol nga impeachment trial batok kang Vice President Sara Duterte tungod sa epekto niini sa tibuok nasod.
Sa pakighinabi sa Bombo Radyo, gibutyag ni Atty. Eddie Cuaresma nga anaa na sa Senado ang bola human ang overwhelming nga endorsement gikan sa Kamara. Isip mga “senator-judges,” katungod sa mga Senador nga husayon ang mga bug-at nga alegasyon sama sa graft, bribery, ug ang kontrobersyal nga confidential funds. Gipadayag ni Cuaresma nga ang saktong pagdumala sa pundo sa katawhan dakong hinungdan kon ngano nga duna’y impeachment trial karon.
Dugang pa, giawhag ang mga Senador nga mahimong patas ug magbinantayon sa paghusay aron malikayan ang bias ug kagubot sa nasod. Importante matud pa nga mahibal-an sa publiko ang kamatuoran sanglit kwarta sa katawhan ang nalambigit sa maong kontrobersiya.