Tingkagol na sa prisuhan ang usa ka 30-anyos nga lalaki human nasikop sa gilusad nga joint buy-bust operation sa Purok 2, Barangay Bagontaas, Valencia City, Bukidnon, niadtong Mayo 9.
Sa report gikan sa kapulisan, giila ang suspek nga usa ka drug personality sa maong dapit. Malampusong narekober gikan sa iyang posisyon ang 11 ka sachet sa gituohang shabu nga motimbang og 22.60 grams ug adunay gibanabanang balor nga kapin sa P153,000.
Gawas sa illegal nga droga, nakuha usab gikan sa suspek ang buy-bust money, usa ka cellphone, ug ang gigamit niining pula nga motorsiklo nga walay plaka. Sa pagkakaron, giandam na sa mga otoridad ang pormal nga kasong paglapas sa Comprehensive Dangerous Drugs Act of 2002 batok sa suspetsado samtang temporaryo kini nga anaa sa kostodiya sa kapulisan.