Andam na ang Bukidnon State University (BukSU) Quezon Campus alang sa pagpahigayon sa Annual Job Fair 2026 karong Mayo 14, 2026 (Huwebes).
Ang maong kalihokan, nga sugdan sa alas 8:00 sa buntag hangtod sa alas 5:00 sa hapon, himoon diha sa BukSU Quezon Covered Court.
Kini nga inisyatibo gipasiugdahan sa unibersidad pinaagi sa pakigtambayayong sa DOLE-10 Bukidnon Provincial Field Office, Department of Migrant Workers (DMW), ug sa Public Employment Service Office (PESO) sa lungsod sa Quezon.
Tumong sa maong koordinasyon nga mahatagan og lehitimo ug dekalidad nga kahigayonan sa pagpanarbaho ang mga graduating students, alumni, ug bisan ang mga residente gikan sa mga kasikbit nga dapit.
Giawhag ang tanang aplikante sa pagdala og updated nga résumé ug application letter alang sa posibleng on-the-spot nga screening o interview.
Gilauman usab nga mohatag og asistansya ang DOLE-10 bahin sa mga katungod sa mga mamumuo ug uban pang serbisyo sa gobyerno atol sa maong adlaw. Ang maong job fair libre ug bukas alang sa tanan.