Patayng lawas  nga nagsugod na og pagkadunot nakaplagan sulod sa apartment sa Maramag Bukidnon

Nakaplagang patay ug nagsugod na og pagkadunot ang usa ka 41-anyos nga lalaki sulod sa iyang apartment sa Barangay Panadtalan, Maramag niadtong Mayo 10.

Base sa report sa Maramag Municipal Police Station, nadiskobrehan ang biktima sa iyang kauban sa trabaho nga mibisita unta aron kuhaon ang ilang service vehicle. Katapusang nakita ang biktima niadtong Mayo 6 atol sa selebrasyon sa iyang adlaw’ng natawhan.

Sa inisyal nga imbestigasyon, walay nakitang timailhan sa foul play sa dapit diin napalgan ang biktima nga nagbuy-od sa iyang katre. Sa pagkakaron, ipaubos ang lawas sa post-mortem examination aron masuta ang tukmang hinungdan sa kamatayon niini.