Landing sa balay tambalanan ang usa ka 50-anyos nga trabahante sa konstruksyon human hapit malunod samtang naligo sa usa ka resort sa Kalilangan, Bukidnon, niadtong Mayo 7.
Sumala sa report, nahitabo ang insidente sa Merida Spring Resort sa Barangay Kinura.
Nasayran nga ang biktima, nga taga-Lumbayao, Valencia City, nakig-inom pa uban sa iyang 58-anyos nga kauban sa wala pa kini moambak sa pool.
Pipila ka minuto ang milabay, namatikdan sa iyang kauban nga wala na motungha ang biktima, busa iya kining gisusi ug nakit-an nga wala na’y malay ilawom sa tubig.
Dali kining naluwas ug gidala sa Bukidnon Provincial Hospital – Kalilangan sa mga responders alang sa dinaliang medikal nga atensyon.
Sa pagkakaron, ang biktima gipaubos pa sa obserbasyon ug gikatakdang ibalhin sa laing pasilidad alang sa dugang nga pagtambal.