Gibanabanang moabot sa kapin P63,000 ang nahimong danyos human gilamoy sa kalayo ang usa ka panimalay sa Spring Village, Poblacion, Pangantucan, Bukidnon, niadtong Mayo 6.
Sa report gikan sa Bureau of Fire Protection (BFP), nagsugod ang kalayo alas-2:00 sa hapon sa balay nga gipanag-iyahan sa usa ka 78-anyos nga lalaki. Sa dihang miulbo ang sunog, anaa usab sa sulod ang anak nga babaye sa tag-iya, apan maayo na lang kay daling nakagawas ang mga biktima.
Tungod sa paspas nga pagtubag sa mga bombero sa Pangantucan Fire Station uban ang MDRRMC, nadeklarar nga fire out ang insidente sulod lamang sa 20 minutos. Walay naitalang angol o kinabuhi nga nakalas sa maong sunog, samtang padayon pang gisuta sa mga otoridad ang tinuod nga mitsa o hinungdan sa maong sunog.