Gipailawom na sa post-mortem examination ug lawom nga imbestigasyon sa mga otoridad ang patayng lawas sa duha ka lalaki nga nakaplagan sa managlahing dapit sa Maramag ug Impasug-ong, Bukidnon niadtong milabayng adlaw, aron masuta ang tinuod nga hinungdan sa kamatayon niini human nadiskubrehan ang mga biktima sa state of decomposition sa sulod sa ilang tagsa-tagsa ka panimalay.
Subay sa inisyal nga imbestigasyon sa kapulisan, nasayran nga ang biktima sa Maramag katapusang nakit-an niadtong adlawng natawhan sa Mayo 6, samtang ang biktima sa Impasug-ong katapusang nakit-an niadtong Mayo 8, apan sa karon walay nakit-ang timailhan sa foul play sa maong mga insidente.
Sa pikas bahin nagbangutan karon ang pamilya sa biktima sa usa ka disgrasya human nakabsan sa kinabuhi ang usa ka 53-anyos nga sakop sa Barangay Public Safety Office (BPSO) samtang kapin sa napulo ka kaubanan niini ang naangol human mabangga ang ilang gisakyan nga Mazda Titan sa Kulaaman Bridge, Brgy. Maluko, Manolo Fortich, kagahapon adlawa, Mayo 8, 2026.
Giila ang namatay nga biktima nga si George Jumamil, kinsa gideklarang dead on arrival sa doktor tungod sa grabeng samad nga naangkon niini.
Nunot sa maong panghitabo, atol sa eksklusibong pakighinabi sa Bombo Radyo, nipadangat sa iyang kasubo ang inahan sa biktima nga si nanay Lilian diin dako ang kasakit nga gipas-an niini lakip ang kabalaka gumikan gagmay pa ang mga anak sa natamatay’ng biktima samtang gisaysay ang panghitabo.
Dugang pa, gihinumduman usab sa asawa sa biktima ang katapusang higayon nga nakadungog kini mahitungod sa iyang bana diin wala damha niini ang maong panghitabo.