Nasikop ang usa ka 60-anyos nga lalaki nga dugay nang gipangita tungod sa kasong murder atol sa gihimo nga hiniusang operasyon sa mga otoridad sa Valencia City, Bukidnon, niadtong Mayo 8, 2026.
Base sa report ni PCOL Oliver Sotto Navales, Provincial Director sa Bukidnon PPO, ngadto kang Regional Director PBGEN Christopher Nortez Abrahano, naila ang dinakpan nga si Jimmy Montecalvo, nailhan usab nga Jimmy Agodolo Monticalvo, usa ka mananom o diver ug lumulupyo sa Purok 13, Poblacion sa maong dakbayan.
Ang malampusong operasyon gipahigayon sa mga personahe sa Provincial Intelligence Unit, Valencia City Police Station, Dumingag Municipal Police Station, Zamboanga del Sur PPO, ug 2nd Bukidnon Provincial Mobile Force Company didto sa Purok 4, Poblacion, Valencia City sa takna sa alas 6:08 sa kagabii.
Si Montecalvo nag-atubang sa kasong murder ubos sa Criminal Case Number 95-10-492 nga gipagawas pa niadtong Hunyo 17, 1995, diin walay pyansa nga girekomenda alang sa iyang temporaryong kagawasan.
Sa pagkakaron, ang dinakpan anaa na sa kustodiya sa Valencia CPS ug gitakdang itugyan ngadto sa korte nga nagpagawas sa warrant of arrest alang sa tukmang disposisyon sa iyang kaso.