Nanawagan ang City Agriculture’s Office sa Valencia sa mga mag-uuma nga palig-onon ang produksyon ug magpundo og pagkaon isip pangandam sa epekto sa El Niño nga gilaumang magsugod karong Hunyo.
Sa pakighinabi sa Bombo Radyo Malaybalay, gibutyag ni City Agriculturist Conie Dalangan nga base sa forecast sa PAGASA, duna’y 79 porsyento nga posibilidad nga moigo ang grabeng hulaw sa nasod. Ang maong hulga dakong hinungdan sa kabalaka tungod sa posibleng pagkunhod sa ulan nga molungtad hangtod sa unang bahin sa 2027 ug makaapekto sa sunod nga cropping season.
Tungod niini, giawhag ang mga mag-uuma nga pahimuslan ang kasamtangang wet season sa pagpananom og humay, mais, ug mga lagutmon. Gidasig usab ang mga residente sa paghimo og water impounding o pagpundo og tubig aron duna’y magamit sa pagpamisbis panahon sa ting-init aron malikayan ang mas grabeng krisis sa agrikultura sa siyudad.