Kapin sa 130 ka mga estudyante sa evolutionary biology gikan sa Central Mindanao University (CMU) ang nipahigayon og duha ka adlaw nga field exposure sa Mount Malimumu, Barangay Magkalungay, San Fernando, Bukidnon.
Ubos sa pag-abag sa 89th Infantry Battalion ug sa pipila ka mga magtutudlo, gisusi sa mga tinun-an ang maong highland area alang sa usa experiential learning program.
Ang maong lugar, nga ancestral domain sa tribung Tigwahanon-Manobo, kanhi nailang balwarte sa New People’s Army (NPA) apan gideklarar na karon nga usa ka “peace zone” tungod sa hiniusang paningkamot sa lokal nga gobyerno ug mga lider sa komunidad.
Gipangulohan nila ni Tribal Leaders Tagyaman Sinangkap ug Layden Esteban ang pag-facilitate sa kalihokan uban sa mga militar ug lokal nga opisyal.
Nagpahayag og kalipay si Lt. Col. Antonio Bulao sa 89th IB sa malampusong suporta sa maong educational activity, dungan ang pag-ingon nga luwas na ang lugar nga kaniadto giisip nga delikado.
Gilauman nga magpadayon ang CMU sa pagpili sa maong dapit alang sa ilang mga umaabot nga study tours ug uban pang akademikong panukiduki.