Usa ka tawo ang patay samtang 16 ang nangaangol human gilusad sa Russia ang usa sa labing dako ug grabeng pagpangatake gamit ang mga ballistic ug hypersonic missile sa kaulohan sa Ukraine nga Kyiv kagahapon, Hulyo 19.
Sumala sa Air Force sa Ukraine, nagpadala ang Russia og kapin sa 40 ka nagkalain-laing klase sa missile—lakip na ang 25 ka ballistic, 10 ka hypersonic missile, ug 125 ka mga attack drone—diin kadaghanan niini gitumong gayod sa kaulohan. Miresulta ang maong pagpangatake sa dagkong sunog sa lima ka distrito sa siyudad diin grabe nga nangadaot ang mga puyoanan sa mga sibilyan, bodega, supermarket, ug bisan ang agianan sa Lukianivska metro station.
Taliwala sa maong trahedya, dinalian nga nanawagan si Ukrainian President Volodymyr Zelensky ngadto sa mga kaalyadong nasod alang sa dugang mga air defense missile interceptor. Giangkon ni Zelensky nga nakasinati karon og grabe nga kanihit sa suplay sa mga Patriot missile ang ilang nasod, nga mao untay labing epektibong panalipod aron mabatukan ang mga missile sa Russia ug masalbar ang kinabuhi sa mga sibilyan.