Bukas ug andam mobalik sa pag-arte ang iladong host nga si Raymond Gutierrez, ilabi na sa pagbida sa usa ka Boys’ Love o BL series, kon duna’y saktong proyekto ug nindot nga istorya nga moabot kaniya.
Gipaambit kini ni Raymond atol sa press conference sa iyang pagpirma og kontrata isip bag-ong primetime news host sa programang “Agenda”. Gibutyag sa host nga duna na unta’y nagtanyag kaniya og BL project sa wala pa ang pandemya sa COVID-19 diin seryoso na unta niya kining gikonsiderar, apan wala lang madayon tungod sa kalit nga pag-igo sa pandemya.
Dugang ni Raymond, iyang namatikdan ang dakong kausaban sa industriya sa kalingawan karon diin mas dawat ug mas bukas na ang publiko ngadto sa mga sakop sa LGBTQIA+ community, itandi sa dihang nagsugod pa lang siya sa iyang showbiz career.