Gilusad sa Estados Unidos ang sunod-sunod nga airstrikes batok sa Iran isip silot human napatay ang duha ka Amerikanong sundalo didto sa Jordan niadtong Biyernes, samtang usa pa ang padayong nawala karon.
Sumala sa US Central Command, kini na ang ikawalong sunod-sunod nga gabii sa ilang pagpangatake diin usa sa mga naigo mao ang gitukod nga Darkhovin nuclear power plant sa kasadpang-habagatan o southwest Iran. Tungod niini, misaka na ngadto sa 16 ka sundalong Amerikano ang nakalas sukad mibutho ang maong giyera niadtong Pebrero 28.
Isip dinalian nga balos, gipaulanan usab sa Iran og mga drone ang duha ka kampo sa Amerika didto sa Kuwait diin naigo ang usa ka ammunition depot sa Camp Udairi ug ang Patriot radar systems sa Ali Al Salem Air Base. Misamot usab ang tensiyon sa Strait of Hormuz nga maoy importanteng agianan sa suplay sa lana sa kalibutan, human gihunong sa Iran ang duha ka barko nga mosulay unta sa pag-agi sa maong dapit.