Kapin sa 100 ka kabalayan ang naugdaw sa dakong sunog sa siyudad sa Drammen, Norway, sumala sa mga opisyal sa rescue services. Mitabon ang baga ug itom nga aso sa maong lugar nga nahimutang mga 50 kilometro gikan sa kaulohan nga Oslo.
Bisan pa sa kadako sa sunog, wala pay gitaho nga namatay o nawala nga residente. Kapin sa 60 ka bombero ang gipakatap aron mapalong ang kalayo, samtang gigamit usab ang mga helicopter nga nagbubo og tubig gikan sa kahanginan aron mapugngan ang padayon nga pagkaylap sa sunog.
Tungod sa kusog nga hangin, paspas nga mikaylap ang kalayo ug miabot pa sa duol nga kalasangan, hinungdan nga gipabakwit sa mga otoridad ang gatosan ka mga residente.
Padayon pa ang imbestigasyon aron matino ang hinungdan sa sunog, ug gidak-on sa mga kadaot.