Nakaplagan sa mga otoridad ang usa ka wala mailhing patayng lawas sa daplin sa suba sa Sitio Palaopao, Barangay Maluko, Sumilao, Bukidnon.
Ang retrieval operation gihimo sa kapulisan sa Manolo Fortich Municipal Police Station ubos sa pagpangulo ni PLTCOL Rogie C. Ortencio, Chief of Police, uban sa PNP Sumilao, Sumilao Fire Station, ug Sumilao Rescue Team.
Gituohan nga ang namatay usa ka lalaki nga nag-edad og 25 ngadto sa 30 anyos. Sa pagkakaron, gipahiluna ang patayng lawas sa Everlasting Funeral Home sa Barangay Kisolon, Sumilao, aron sa posibleng pag-ila sa iyang identidad ug paghulat sa mga kabanay niini.
Gihangyo sa mga otoridad ang publiko nga kung adunay nawad-an og miyembro sa pamilya o adunay kahibalo sa usa ka lalaking nawala, mahimo silang moadto sa maong punerarya aron masuta kon ang nakaplagang lawas ba mao ang ilang gipangita.
Padayon karon ang imbestigasyon sa mga otoridad aron mailhan ang biktima ug matino ang hinungdan sa iyang kamatayon.