Kadagkuan sa BPMC, subling giklaro ang isyu kalabot sa delayed nga suholan

Subling gipasabot sa tigdumala sa Bukidnon Provincial Medical Center (BPMC) nga ang pagkalangan sa pag-release sa suholan sa pipila ka empleyado nalambigit sa dili tukmang panahon nga pagkompleto ug pagpasa sa gikinahanglang mga dokumento.

Matud ni Dr. Miguel Antonio C. Prantilla, Chief sa Bukidnon Provincial Medical Center (BPMC), kaniadto na kining nahimong problema tungod sa pipila ka empleyado nga napakyas sa pagtuman sa deadline sa pagpasa sa ilang mga papeles, hinungdan nga balik-balik silang gipasidan-an.

Gipunting niini, nga kasagaran madalahig o madamay ang ubang empleyado tungod sa maong panghitabo.

Gipasabot usab niini ang kabag-ohan sa mga proseso nga usa usab sa mga hinungdan sa pagkalangan sa pagdawat sa sweldo.