Naglusad og lapad nga air-strike ang nasod sa Russia ngadto sa nagkalain-laing dapit sa Ukraine, lakip na sa kapital niini nga Kyiv, nga miresulta sa pagkamatay sa kapin sa 10 ka tawo ug nakaangol sa kapin 100 ka mga sibilyan.
Sumala sa taho, dungan nga gipauwanan sa Russia og mga missile ug attack drones ang mga kabalayan ug dagkong edipisyo, nga hinungdan sa pagkaguba ug pagkahugno sa pipila ka mga apartment diin duna pa’y mga biktima nga natabunan sa mga guba. Gawas sa Kyiv, grabeng naigo usab ang siyudad sa Dnipro ug Kharkiv.
Giangkon sa Ministry of Defense sa Russia ang maong pagpangatake ug ilang gipahayag nga tinguha nila nga gub-on ang mga pasilidad sa militar ug industriya sa Ukraine. Samtang, dinalian sab nga gipasalig sa Embahada sa Pilipinas nga luwas ug na-account ang tanang mga Pilipino nga kasamtangang anaa sa Ukraine human sa maong makapangitngit nga trahedya.