Nagpabilin nga dakong hagit ang seryoso nga problema sa pagpayuhot ug pagpamaligya sa illegal nga droga sa tibuok Rehiyon 10.
Sa eksklusibong pakighinabi sa Bombo Radyo Malaybalay kang Police Major Joann Navarro, tigpamaba sa Police Regional Office 10 (PRO-10), gibutyag niini nga ang kantidad sa mga nakumpiska nga illegal nga droga sa mga operasyon kanunay nga mukabat sa milyones matag semana.
Usa sa pinakabag-ong kaso mao ang pagkasikop sa usa ka laborer sa dakbayan sa Valencia diin nakumpiska ang tunga sa milyon nga kantidad sa illegal nga droga.
Dugang pa niini, nga sa nagkalain-laing operasyon nga gipahigayon sa miaging semana, mikabat sa kapin P10 milyon ang kantidad sa droga nga nasakmit sa rehiyon.
Sumala pa ni Navarro, wala’y natala nga insidente sa pagsukol sa mga suspetsado atol sa mga buy-bust operation.
Gisiguro usab sa PRO-10, nga tanang lakang gihimo pinasikad sa balaod ug hugot nga gisubay ang mga protocol aron malikayan ang paglapas sa katungod sa tao ug aron masiguro nga hustisya ang mopadangat.