Wala na makaikyas pa ug dinalian nga nasikop didto sa Zamboanga del Sur ang giila nga Top 6 Provincial Most Wanted Person sa Bukidnon human kini gisilbihan sa iyang warrant of arrest sa kasong attempted robbery with frustrated homicide.
Sa opisyal nga report sa kapolisan, giila ang suspetsado nga si Oliver Entera, 42 anyos, minyo, ug lumad nga residente sa Barangay Poblacion, siyudad sa Valencia. Natultolan ug nadakpan si Entera sa gikasang operasyon sa mga sakop sa Valencia City Police Station kauban ang mga operatiba sa Zamboanga del Sur didto sa Purok Biolita, Barangay Lintugop, lungsod sa Aurora, pasado alas-says singkwenta (6:50) sa gabii niadtong Mayo 23.
Gibutyag sa kapolisan nga duna’y gitakdang piyansa ang korte nga mokabat sa usa ka gatos ug kawhaan ka libo ka pesos (P120,000) alang sa temporaryong kaluwasan sa suspetsado. Sa pagkakaron, temporaryo nang gipreserba sa kustodiya sa Valencia City Police Station ang nadakpan alang sa saktong dokumentasyon ug disposisyon sa korte.