Mihatag og pamahayag si Davao City Mayor Sebastian “Baste” Duterte kabahin sa giatubang nga warrant of arrest ni Senador Ronald “Bato” dela Rosa gikan sa International Criminal Court o ICC.
Sa gipahigayun nga event sa “Rage Coalition”sa Mindanao niadtong Sabado, Mayo 23, sigon sa alkalde nga nalipay ug naguol siya sa posibilidad nga madakpan si Dela Rosa ug madala sa The Hague.
Matud ni Baste, kung mahitabo kini adunay kauban ang iyang amahan nga si kanhing Pangulong Rodrigo Duterte nga kasamtangang detained sa ICC detention facility tungod sa kasong crimes against humanity.
Giila si Dela Rosa isip usa sa mga nag-unang nagpatuman sa kontrobersyal nga kampanya kontra iligal nga droga atol sa administrasyong Duterte isip kanhing hepe sa Philippine National Police o PNP.
Sa maong talumpati, gisaway usab ni Baste Duterte ang administrasyon ni Pangulong Ferdinand Marcos Jr., ug giingon nga wala siya’y interes nga makigkooperar sa kasamtangang gobyerno.
Dugang pa niini nagkagrabe na ang kahimtang sa katawhan ug gipunting ang mga kritiko sa administrasyon.