Gibutyag ni Sen. Panfilo Ping Lacson nga kinahanglan nga lig-on ang intelligence operations sa mga otoridad aron mas paspas ang pagdakop ang mga high-profile nga pugante sa balaod.
Matud ni Lacson, importante kaayo ang maayong pagkuha ug impormasyon ug koordinasyon sa tanang law enforcement agencies aron dali makit-an ang mga pinangita sa hustisya, lakip na si Senador Ronald “Bato” dela Rosa, negosyanteng si Atong Ang, ug uban pang mga indibidwal nga giingong naa sa listahan sa mga pugante.
Gipunto sa senador nga masayang lang ang pondo ug effort sa gobyerno kung walay klarong intelligence gathering ug plano sa operasyon. Sumala niini nga ang intelligence kinahanglan nga “adlaw-adlaw” nga trabahohuon sa mga law enforcers.
Sa laing bahin, gibatikos usab ni Lacson ang pipila ka abogado nga nagpakaylap og sayop nga impormasyon ug sayop nga pag-analisa sa sitwasyon ni Dela Rosa itandi sa iyang kaugalingong kasinatian kaniadto.
Matud ni Lacson, lahi ang ilang kahimtang gumikan iyang kaso sauna giila niya isip “fugitive from injustice,” samtang si Dela Rosa karon adunay gi-issue nga lehitimong arrest warrant gikan sa International Criminal Court (ICC).
Sa pikas bahin, nanawagan pag-usab si Senador Risa Hontiveros alang sa malinawon nga pagsurender ni Senador Ronald dela Rosa.