Gipasiugda sa House prosecution panel nga dili kinahanglan nga maapektuhan o malangay sa bisan unsang re-shuffle sa liderato sa Senado ang padayong impeachment trial batok kang Vice President Sara Duterte.
Matud ni Lanao del Sur Representative Zia Alonto Adiong, spokesperson sa panel, ang ilang prayoridad mao ang hingpit ug walay paglangan nga pagpresentar sa mga ebidensya ug mga testigo atubangan sa Senate impeachment court.
Gipasabot ni Adiong nga katungod sa katawhan nga mahibal-an ang mga ebidensya sa kaso, ug katungod usab sa bise presidente nga dili madugay ang proseso sa pagdungog.
Dugang pa niini, ang impeachment usa ka pamatuod nga walay opisyal sa gobyerno nga bisan unsa pa kataas sa posisyon ang mahimong mulikay n sa pagpangayo og accountability ubos sa Konstitusyon.
Kini misunod sa mga taho nga adunay lihok ang minority bloc sa Senado aron matudlo si Senador Sherwin Gatchalian isip bag-ong Senate President puli kang Sen. Pres. Alan Peter Cayetano nga bag-o lang milingkod sa posisyon niadtong Mayo 11.
Matud usab ni Adiong nga ilang ginatan-aw isip internal matter sa Senado ang isyu sa liderato ug ilang girespeto ang independence sa maong institusyon.
Sa kasamtangan, nakatakdang mosumite si Vice President Duterte sa iyang tubag sa Articles of Impeachment karong Hunyo 1, 2026, samtang gitakda sa Senado ang pagsugod sa pre-trial proceedings sa Hulyo 6, 2026.