Mokabat sa kapin 2,500 ka mga Overseas Filipino Workers (OFW) lakip mga dependents ang luwas nga nakabalik sa nasud gikan sa Middle East sugod niadtong Marso 5 hangtod Marso 29, 2026.
Kini ang gihimong kumpirmasyon ni Presidente Ferdinand Marcos Jr., diin gipasiugda sa Presidente ang dinaliang aksyon sa gobyerno alang sa mga Pilipino nga naapektuhan sa kagubot sa maong rehiyon.
Sa kinatibuk-an, mokabat sa 2,551 ka mga OFW ug 835 ka mga dependents ang natabangan sa pagpauli, samtang anaa pa sa 700 ka mga indibidwal ang kasamtangang nagpaabot sa repatriation.
Dugang pa sa Presidente, aduna usab gipatuman ang gobyerno nga reintegration program aron matabangan ang mga nanguli nga makasugod og balik, alang panginabuhian sa Pilipinas.
Samtang, niabot na sa 18,394 ka mga OFW ang nakadawat og nagkalain-laing matang sa ayuda sama sa pagkaon, temporaryong puy-anan, medical aid, ug financial support gikan sa kapin 32,000 nga nangayo og tabang sa maong krisis.
Gawas sa materyal nga tabang, naghatag usab ang Department of Information and Communications Technology (DICT) og libreng tawag ug internet access sa mga buhatan sa tibuok nasud aron maseguro nga makakomunikar ang mga pamilya ngadto sa ilang mga kabanay nga anaa pa sa Middle East.
Gipasalig ni Presidente Marcos Jr. nga dili mohunong ang gobyerno sa paglihok hangtod maseguro ang kaluwasan sa matag Pilipino ug mabati ang maong serbisyo sa matag panimalay nga naapektuhan sa maong sitwasyon