Gidagsa sa mga residente ang katapusang adlaw sa voter’s registration dinhi sa Malaybalay aron makapalista ug makapa-update sa ilang rekord isip mga botante alang sa umaabot nga piniliay. Sayo pa lamang sa kabuntagon, taas na ang linya sa mga aplikante nga nagpaabot sa ilang turno sulod sa registration area nga gipahigayon sa Commission on Elections o COMELEC-MALAYBALAY.
Lakip sa nagtambong ang mga first-time voters, mga magpa-reactivate sa ilang rehistro, ug kadtong magpa-transfer sa ilang voting records. Sa pakighinabi sa Bombo Radyo Malybalay ngadto na kang Atty. Danilo Dividina, ang chairman sa Comelec-Malaybalay nga ubay-ubay gayud ang ang miadto sa buhatan sa karong adlawa nunot sa katapusang adlaw na kini sa pagparehistro.
Samtang, gipasabot sa usa ka inahan sa Person’s With Disability (PWD) ang hinungdan nganong nalangan kini sa pagparehistro sa anak. Saysay ni Sheryl Olipendo-San Jose nga tungod sa kabisi sa matag adlaw ug sa daghang mga buluhaton isip usa ka ginikanan, karon lamang nakahigayon sa pag-anha sa buhatan sa COMELEC.
Gipasabot ni Sheryl nga nanginahanglan gayud og hugot nga pag-atiman ug pag-uban ang iyang anak, hinungdan nga wala kini daling maparehistro sa mga nangaging mga adlaw.
Dugang pa sa maong inahan, bisan pa man sa ka-busy, gipaningkamutan niini nga madala ang anak sa katapusang adlaw sa rehistrasyon aron mahatagan kini og higayon nga makat-on ug malamdagan ang hunahuna mahitungod sa proseso sa pagbotar.