Gitawag nga “moment of Grace” sa Bishop sa Diocese of Malaybalay ang impeachment ni VP Sara Duterte kalabot na sa giatangan nga pag-convene sa senado karong adlawa, Lunes, Mayo 18 tuig 2026.
Matud pa ni Most Reverend Noel Pedregosa, D.D, mahinungdanon nga mapatuman na ang maong proseso sa labing dali nga panahon.
Isip usa ka obispo sa Diocese of Malaybalay ug miyembro sa Catholic Bishops’ Conference of the Philippines (CBCP), gipadayag niini nga ang maong impeachment trial dili lang usa ka legal nga proseso, kundili usa usab ka higayon sa pagpanalangin ug grasya gikan sa Kahitas-an.
Dugang pa sa obispo, kini nga lakang magsilbing pamaagi alang sa dinalian ug dungan nga pagsusi ug pagtimbang sa kaugalingon ug sa tibuok komunidad sa mga Pilipino aron masuta ang kamatuoran alang sa kaayuhan sa nasud.
Suportado matud pa niini ang panawagan sa Catholic Bishops’ Conference of the Philippines (CBCP) isip miyembro ug nagpabiling positibo alang na sa pagpalambo sa tulubagon o accountability, transparency, ug pagkamatinud-anon sa panggamhanan.
Matud pa ni Bishop Pedregosa, hugot kining naglaom nga pinaagi niini nga lakang, mapromote ang kaayuhan sa kadaghanan, ingon man ang kamatuoran ug hustisya alang sa tibuok nasud.