Gidakop sa mga otoridad ang kanhi PBA player nga si Mark Cardona human kini gireklamo tungod sa pambabastos sa usa ka dalaga.
Sumala sa kapulisan, kalit lang kuno nga gihagkan ni Cardona ang usa ka 21-anyos nga dalaga sulod sa usa ka night club sa Bonifacio Global City (BGC) sa Taguig niadtong gabii sa Marso 28.
Giduol ang basketbolista sa uyab sa babaye diin didto na nagsugod ang ilang tinubagay hangtod nga nagka-pisikalay.
Giulang sila sa mga security guard sa maong bar ug didto na gitawag ang mga pulis.
Duna puy laing mga kababaihan nga nakasinati sa susamang insidente, hinungdan nga miadto usab sila sa presinto aron ireklamo ang kanhi basketbolista.
Mag-atubang og kasong acts of lasciviousness ug physical injury ang kanhi magduduwa sa Talk ‘N Text Tropang Texters.