Nagkauyon ang Israel ug Hezbollah sa pagpasig-uli sa usa ka ceasefire taliwala sa padayon nga mga paglapas sa miaging kasabutan.
Ang bag-ong kasabutan gipasiugdahan sa US ug adunay estrikto nga mga kondisyon alang sa duha ka panig.
Lakip sa mga kondisyon mao ang pag-atras sa Hezbollah paingon sa amihanan sa Litani River, mga 30 kilometros gikan sa utlanan sa Israel.
Apil usab niini ang hinay-hinay nga pag-atras sa mga tropa sa Israel gikan sa habagatang Lebanon paingon sa ilang side sa utlanan.
Ang Lebanese Armed Forces ug mga tropa sa United Nations lamang ang tugotan nga mopabilin sa buffer zone sa habagatan sa Litani River.
Bisan pa niini, gipabilin sa Israel ang katungod sa pagbalos o paglihok kung adunay mga gitaho nga pag-atake o paglapas sa kasabutan.
Tungod sa maong ceasefire, liboan ka mga residente nga nawad-an og pinuy-anan ang nakabalik sa ilang mga panimalay sa habagatang Lebanon.
Apan nagpabilin gihapon nga delikado ang sitwasyon tungod sa mga taho sa pagbayloay og bala ug drone attacks tali sa duha ka kampo bisan human ipatuman ang kasabutan.