Nagbahad ang Israel nga andam niining ibalik ang Iran sa “dark ages,” samtang nagkagrabe ang tensyon sa taliwala sa duha ka nasud.
Kini ang nahimong pamahayag ni Israeli Defense Minister Israel Katz, diin matud pa niini, andam na ang militar nga sugdan pag-usab ang opensiba batok sa Iran.
Gipahayag usab ni Katz nga “The targets are marked” ug naghulat na lang sila sa pagtugot sa U.S. aron ipadayon ang operasyon.
Dugang pa sa opisyal sa Israel, tumong niini nga hingpit nga pabagsakon ang pagpangulo sa dinastiya ni Khamenei.
Samtang, gipaabot nga magtagbo si Israeli Prime Minister Benjamin Netanyahu uban ang mga tag-as nga opisyal sa seguridad aron hisgutan ang sitwasyon sa Israel ug Lebanon.
Padayon usab nga nagkagrabe ang panagbangi tali sa Estados Unidos ug Iran.
Lakip sa mga nahitabo mao ang pag-ilog sa U.S. sa mga barko nga giingong adunay kargang lana gikan sa Iran, dungan sa pagpasira pag-usab sa Iran sa Strait of Hormuz.
Bisan pa man sa mga naunang pag-atake sa Israel nga nikalas sa kinabuhi sa pipila ka tag-as nga opisyal sa Iran, nagpabiling lig-on ang kagamhanan sa maong nasud.