Gipasalig sa legal nga kampo ni kanhi Presidente Rodrigo Duterte nga pamatud-an niini sa atubangan sa International Criminal Court (ICC) nga usa lamang ka “complete fiction” o gama-gama ang mga alegasyon nga adunay direktiba ang kagamhanan sa pagpatay og mga suspek ubos sa war on drugs.
Matud pa ni defense counsel Nicholas Kaufman, nagsalig lamang ang kaso sa prosekusyon sa mga saksi nga sumala pa niini, walay kredibilidad.
Gibatikos usab ni Kaufman ang desisyon sa ICC Pre-Trial Chamber I nga kumpirmahon ang mga kasong crimes against humanity, lakip na ang murder ug attempted murder, batok sa kanhi pangulo.
Gipasabot ni Kaufman nga wala pa masusi sa confirmation hearings kon katuohan ba ang mga saksi sa prosekusyon.
Gikuwestiyon usab sa depensa ang posible nga paghatag og mga ganti sa mga saksi isip baylo sa ilang mga pamahayag, sama sa pagluwas kanila sa bisan unsang kaso ug paghatag og bag-ong pagkakakilanlan gamit ang pundo sa international community.