Mikunhod ang ihap sa mga walay trabaho nga Pilipino ngadto sa 1.93 milyon niadtong buwan sa Marso, tandi sa 1.94 milyon niadtong Pebrero, subay sa report sa Philippine Statistics Authority (PSA).
Katugbang sa 3.9% nga jobless rate, mas taas tandi sa 3.8% nga natala sa milabayng bulan.
Gumikan niini, namaktikdan nga misaka ang gidaghanon sa mga trabahante nga nangita og dugang trabaho o working hours aron madugangan ang ilang kita.
Niadtong bulan sa Marso, 6.44 milyon ang narekord nga underemployed, mas taas tandi sa 4.96 milyon sa bulan sa Pebrero. Tungod niini, nisaka usab ang underemployment rate ngadto sa 13.4%, gikan sa 10.1% sa miaging buwan.
Indikasyon kini nga samtang mikunhod ang ihap sa mga walay trabaho, nagpadayon gihapon ang hagit sa pagpangita og hustong kita alang sa daghang trabahante.
Ang maong datos angay aksiyunan sanglit galaum ang katalingban nga mahatagan og pagtagad ang maong dilema labi na sa mga mamumuo sa nagkadaiyang dakbayan. Sa pagkakaron, wala pay gigawas nga pahayag ang administrasyong Marcos Jr. batok sa maong datos, samtang padayon kining ginatun-an.