Nakabsan sa kinabuhi ang usa ka 47-anyos nga lalaki human kini gidunggab samtang anaa sa usa ka vigil sa Purok 8, Barangay Camp 1, Maramag, sayong kabuntagon niining adlawa, Abril 30.
Sa inisyal nga imbestigasyon sa mga otoridad, nahitabo ang madugong insidente alas 1:00 sa kaadlawon. Nasayran nga samtang nagduwa og baraha ang biktima sa maong vigil, kalit kining niabot ang suspek ug giakusahan sa pagpangawat og pitaka ang biktima. Wala madugay, gidunggab sa suspek ang biktima sa tuo nga bahin sa dughan ug daling misibat paingon sa wala matino nga direksyon.
Gidala pa ang biktima sa labing duol nga balay tambalanan apan gideklara kining dead on arrival. Gihulagway ang suspek nga adunay “medium build,” moabot sa 5’6” ang gitas-on, ug nagsul-ob og kolor blue nga T-shirt sa dihang nahitabo ang krimen.
Gilusad na sa kapulisan sa lungsod sa Maramag, kauban ang mga opisyal sa barangay, ang usa ka hot pursuit operation alang sa dinaliang pag-aresto sa maong suspetsado. Nanawagan usab ang mga otoridad sa publiko nga makigtigayon kanila kon adunay impormasyon sa nahimutangan sa mamumuno.