IMPASUGONG, BUKIDNON – Usa ka 41-anyos nga mangingisda ang napalgan nga wala na’y kinabuhi human kini giingong napaakan sa usa ka makahilo nga halas sa Barangay Kalabugao, Impasugong, niadtong milabayng adlaw.
Sa report gikan sa Impasugong Municipal Police Station, giila ang biktima nga residente sa Sitio New Imbatog. Nasayran nga milakaw ang biktima niadtong Abril 27 aron mangisda, apan wala na kini makapauli hinungdan nga gipangita sa iyang pamilya.
Pag-abot sa buntag sa Abril 28, napalgan ang biktima nga wala na’y kinabuhi sa daplin sa suba. Sa inisyal nga pagsusi sa mga otoridad, nakit-an ang marka sa pinaakan sa bitin sa wala nga bukton niini, nga gituohang hinungdan sa iyang hinanaling kamatayon.
Sa pagkakaron, gipahigayon pa sa kapulisan ang dugang imbestigasyon aron hingpit nga makumpirma kon unsa nga matang sa halas ang nakapaak sa biktima ug aron masuta kon wala ba’y foul play sa maong insidente.